Matrimonio de 1908. Eso ye lo que ponía al pie d'esta semeya el llibru La foto y su historia, espublizáu col diariu llaniscu El Oriente de Asturias. Tovía nun analicemos los traxes d'aldeana de principios del sieglu pasáu pero al repasar les tipoloxíes de la segunda metada del XIX decatámonos de que correspuende más bien a la década de 1880 aproximadamente.
L'home va vistíu a la moda burguesa, con pantalón llargu, chaqueta, xilecu (con solapes), camisa con tarabica, cadena y reló.
La muyer lleva un traxe d'aldeana preciosu. Lo primero que me llamó l'atención fue que nun coincidía nin el collor nin el xéneru de la saya y la chaquetiya, como suel ser vezu. La saya, de gran vuelu y adornada con cintes de pasamanería ye parda o de color, mientres que la chaquetiya ye de terciopelu negro, igual qu'el dengue. Dambos lleven cintes de pasamanería rematando los bordes.
El mandil ye dignu de mención, lleva bordaes fueyes de racimal con apliques de pedrería a mou d'uves y fleco nel borde.
Acolúmbrase bien el pañuelu y lleva banda, que como yá dixi, nun yera omnipresente daquella; zapatu negru y media blanca asomen perbaxo la saya.
Como xoyes lleva unos perendengues que recuerden a les arrecaes portugueses, una cinta con medalla como gargantilla y un broche nel pechu. Como elementu de prestixu, un abanicu na mano.
¿Y el peinao? vaya traxe más guapu.
ResponderEliminarLo que nun veo ye´l reló del paisano.
¿Por que ye elementu de prestixu l´abanico si aquí n´Asturies nun fai muncha falta?
A partir de la década de 1870 los moños faense na parte alta de la cabeza, faciendo primero ondulaciones sobro la frente y flecos más tarde. El pañuelu nel traxe aldeana SIEMPRE se pon adaptándose al peináu de moda.
ResponderEliminarEquí va un enllaz con exemplos gráficos qu'ayuden a la datación:
http://demodecouture.com/hair/index.html
El reló nun se ve, intúise. Lo que se ve ye la cadena.
L'abanicu ye elementu de prestixu precisamente por eso, les clases populares nin lu usaben nin lu necesitaben, pero pa les dames burgueses yera complementu indispensable pa dir al teatru, la ópera o cualquier otru eventu social.