Esta semeya tien gran importancia por tres razones: lo antiguo, la bona calidá d'imaxe y que nella puen vese dos traxes completos d'home y muyer.
La datación nun ye cenciella y siempre ta abierta a alegaciones. Baséme principalmente na forma peinase y llevar la barba del paisanu, característica de finales de los años 1850 - principios de los 1860; ella lleva'l pañuelu bordeando la cara. Les muyeres d'aquella peinábense con raya al mediu, tapando col pelo les oreyes, y facíen un moñu baxu na parte atrás de la cabeza. A partir de 1865 esta tendencia cambia, les oreyes empiecen a vese y pasín ente pasu el pelo dirá prendiéndose ca vez más p'arriba, situándose los moños na parte alta de la cabeza pal restu'l sieglu. El pañuelu, dirá evolucionando tamién na forma de ponelu, separándose de la empezadura del pelo hacia arriba a medida que los moños se van faciendo más altos.
Falando del traxe d'ella hai que destacar lo austeru que ye, tamos avezaos a ver traxes recargaos d'adornos en pasamanería y pedrería cuando esti tien únicamente un reborde finísimu en terciopelu y una discretísima cinta bordada pa rematar la pechera y los puños de la chaquetiya; el dengue lleva unes cintes tresversales tipu "tripa de pollo" como únicu ornatu. La saya, de munchu vuelu, y el mandil, cuadráu y mui fruncíu nun lleven terciopelu siquiera, simplemente unes llorcies na propia tela -yos sirven d'aderezu. Les xoyes, poques y discretes.
L'home lleva una camisa de cuellos almidonaos y bien alzaos como yera moda a mediaos del XIX, xilecu de pañu con solapes y chamarra. El calzón va abotonáu nos llaterales y remata con una guyeta, nun dexando ver los canzonciellos. Trai medies de llana y va calzáu de zapatos, igual que la muyer; nun lleva montera. Na mano, un paragües.
La fía, vistida a la moda burguesa, ye'l puntu central del retratu y danos información de la clase social a la que peretenecen los pas, que van ataviaos "d'asturianos" pa la ocasión. La globalización nel vistir burgués de la época contrasta col sentir románticu de pertenencia a un llugar y lleva a veces a la xente de clases acomodaes a retratase cola indumentaria'l país.
Nun toi d´acuerdu cola descrición de la decoración del dengue. En llugar de "tripa de pollo", pa mi ye cinta de terciopelo colocá en picos, asemeyando la forma de ringo-rango.
ResponderEliminarPor otru llau, gustame muncho el peinao de la guah.a.
Ana
Pue ser. De toes formes hai que tener en cuenta que los adornos en ringo-rango son funcionales, quiero dicir, que s'usen pa rematar partes redondiaes como los cuellos del dengue y la chaqueta pa poder axustalo meyor, mientres qu'el terciopelu recto déxase pa les partes rectes. Tamién ye verdá qu'hai esceiciones y vense ringo-rangos en partes "rectes".
ResponderEliminarEl peináu de la neña ye bien cenciellu, raya al mediu y dos coletes trenzaes de raíz.