A veces na rede tópense semeyes como esta, mui ilustrativa pa comentar la evolución del traxe d'aldeana, l'antes y l'agora, l'antaño y l'anguaño. Trátase d'una esposición d'indumentaria tradicional asturiana de la qu'ignoro autor, fecha y llugar en que se fexo, anque camiento que puea ser del colectivu Vezos Astures na feria de L'Ascensión d'Uviéu.
Estremaes por un ramu, vemos dos pareyes con traxes del Oriente, a la manzorga el que se llevare a mediaos del s. XIX y a la mandrecha el que se lleva agora de manera ritual.
El traxe del home antiguamente nun se diferenciaba del que se llevaba nel restu d'Asturies; ye a principios del sieglu XX cuando apaecen les diferencies que "caractericen" al traxe de porruanu, como son los remontes faciendo formes vexetales nos calzones y la chaqueta o'l vezu de nun vistir les mangues d'esta, aparte de la tipificación del usu de medies azules y coricies.
Nel traxe d'aldeana la tresformación ye muncho mayor. El dengue, el mandil y la saya arretáquense de bordaos en pedrería (acebache, cristal), costume qu'entama a finales del XIX y va xorreciendo a lo llargo del XX; la chaquetiya dende la década de 1.880 va prendida siempre al hombru izquierdu y dexa de vistise, llegando incluso a cosese al dengue. La banda antiguamente nun yera omnipresente como agora, anque hai testimonios de que se llevaba yá na década de 1860. El pañuelu solía atase atrás pa los díes de fiesta y enriba la frente (como nel restu d'Asturies) pal diario. El llargu de la saya va variando según la moda durante'l pasáu sieglu, pasando de llegar a los todíos nes primeres décades a ser minifalderu nos 60, anque polo xeneral, dende los años 20 llévase a media pierna. Últimamente ta poniéndose "de moda" volver a formes d'entamos del sieglu XX: sayes llargues hasta'l todíu, menor cantidá de pedrería, bordaos más cenciellos imitando a los antiguos...
Hola,podrías explicarnos cómo se coloca el pañuelo.Gracias.
ResponderEliminarHola. Bueno, lo primero que tengo que dicir ye que nun tengo muncha esperiencia en poner pañuelos. Puedo date una esplicación somera de como se fai, pero camiento que lo meyor ye velo y que te lo vaigan esplicando sobro la marcha; lo demás, la práctica.
ResponderEliminarLo primero de too ye facer un moñu de tarabica, o lo que ye lo mesmo, una trenza fecha sobro la coroniella doblada y prendida nel mesmu sitiu onde ñaz. Depués colocaremos el pañuelu col revés hacia arriba sobre la cabeza, de manera que caiga el picu tapando la cara y los otros dos estremos a la altura de les oreyes. Nesta postura prenderémoslu al pelo con horquilles.
A continuación, échase el pañuelu p'atrás y faense tres llorcies, prendiendo caúna con un anfiler a l'altura la frente.
Depués crúciense los cabos perriba la ñuca (debaxo'l moñu), pasando primero'l drechu, que se priende fuertemente al pelo con una horquilla grande que sirve pa garrar el pañuelu pela parte inferior. Esta horquilla tápala'l cabu izquierdu al superponese.
Por último, los dos cabos átense sobro'l moñu, depués de fixalos bien con anfileres pa que nun baillen, dexando los picos tiesos hacia arriba.