El Traxe de Porruanu

Hasta agora falemos de los oríxenes del traxe d'aldeana llanisca y la so evolución a lo llargo de la segunda metá del sieglu XIX al traviés del estudiu de les semeyes antigües que se conserven.

Pero, ¿y'l traxe de porruanu? Pa los profanos nel tema hai que dicir qu'esta ye la denominación actual del equivalente masculín al traxe d'aldeana. Probablemente en Porrúa se caltuviere más tiempu l'usu de la indumentaria tradicional que na villa de Llanes, onde les modes burgueses calaríen primero y fuera ésta la manera de refirise al mou de vistir de la xente de los pueblos, yá fueren porruanos o non. La verdá ye que l'orixe del términu ye inciertu.

 

Vamos ver de siguío les carauterístiques de les que se compón un traxe de porruanu:

•  Montera picona d'una sola ala de pañu negro.

•  Camisa con llorcies y bordaos na pechera, cuellu y puños, y canzonciellu, d'algodón o filo fino los dos.

•  Xilecu de tela brocao o adamascao, llisu o estampáu de rayes, cuadros o flores. Ensin cuellu nin solapes y col espaldar siempre en rasu negro, ensin bordaos nin sobrepuestos. Lleva botones metálicos doraos o plateaos.

• Faxa que ye siempre colorada, cayendo ún de los estremos sobro la pierna izquierda.

• Chaqueta fecha siempre na mesma tela quel calzón, xeneralmente pañu en colores variaos (pardos, verdes, agranataos, azulones o negros) o terciopelu. Lleva adornos de tela remontao prieto (xeneralmente fieltro) nos dos delanteros, nel mediu la espalda y a lo llargo de les mangues, representando motivos vexetales en dos o tres modelos distintos. Faise carauterístico del traxe de porruanu el nun vistir les mangues de la chaqueta, sacando los brazos peles abertures de les bocamangues qu'esta prenda tien a l'altura de los sobacos.
  Otra peculiaridá d'esta prenda ye que nun se pue abotonar porque nun tien oyales nos delanteros, sinon botones a un llau y al otru, de manera que son sólamente d'adornu.

• Calzón, que tamién lleva adornos remontaos nos delanteros y los traseros, además de culera. Tamién ye típico del traxe de porruanu una especie de tira faciendo pestañes en cuenta d'oyales a lo llargo de la pernera.

• Medies azules d'algodón.

• Coricies y escarpinos, nunca madreñes nin zapatos.

• Palu.

Sicasí, si comparamos los actuales traxes de porruanu col vistir tradicional asturianu, yá fuere de la zona oriental o non, podemos puntualizar dellos matices:

• Los xilecos nes teles más arriba mentaes, solamente l'home que tuviere una posición económica acomodada se los podía permitir. Lo corriente yera gastalos de pañu, estameña o sayalín.
  Dir bien vistíu implicaba llevar el xilecu abotonáu, lo contrario yera una informalidá, como'l dir arremangáu o despechugáu.
  Esti fatu llevaba cuellu y solapes, hasta qu'a finales del XIX, el traxe "urbanu" lu sustitúi por otru ensin ello, camudando tamién la montera pola boina y'l calzón pol pantalón llargu. Esti tipu más modernu de xilecu ye'l que caltienen los traxes de porruanu d'anguaño.
  
• La faxa antiguamente llevábase en colores y texíos estremaos. La costume de llevar un cabu pingando hasta la rodiella ye mui moderna, pue dicise que se popularizó na segunda metá del s. XX, antes trayíase bien enrollada a la cintura.
  
• La chaqueta y'l calzón solíen facese, cuando había posibles, del mesmu xéneru. Eso nun quita pa que se llevaren en teles y colores diferentes, xeneralmente pardos, verdes o negros por ser éstos los más asequibles.
  Los remontes de tela nun son esclusivos de Llanes nin muncho menos. La necesidá facía que la ropa se remendare una y otra vez pol escesivu usu, y l'habilidá de les costureres a la hora d'echar sobrepuestos acabó dexándomos motivos como los que se conserven anguaño nos traxes de porruanu.
  Les botonadures ornamentales, esto ye, les que nun tienen oyales onde abotonar, posiblemente seyan una reminiscencia de los aristocráticos traxes a la francesa y de majo del s. XVIII, y si bien puntualmente se ven na indumentaria popular, ye más bien de manera anecdótica polo poco práutiques que resulten. Son más habituales na abertura llateral del calzón que nos delanteros de la chaqueta.
  
• Les medies principalmente yeren de llana, blanques o pardes pal diariu y azules pal mayor postín.
  
•  Además de con coricia l'escarpín llevóse con madreña, y tamién se llevaron, en menor midida, botes y zapatos.
  
  

Pue dicise qu'el traxe de porruanu estereotipa unos xéneros, colores, modes y prendes, descartando otros y fosilizando les posibilidaes de recreación qu'ufre la indumentaria tradicional, y tamién que trai al imaxinariu común formes que pretenden ser esclusivamente llanisques, como los sobrepuestos, el  nun vistir les mangues de la chaqueta, etc.y que nun lo son.

Soportes de saya, pieces poco conocíes

Tener la cintura delgada y un cadril abultáu taba de moda na década de los 90 del sieglu XIX y garantizaba un bon porte a la que llevare un traxe d'aldeana cortáu a la moda, como esta rapaza de 1.897.

Pero non toles muyeres teníen esa suerte, a munches la saya quedába-yos pingona o baxába-yos mui en recto al nun tener cadriles anchos o un traseru grande que -yos sirviere d'encontu a la tela. La mayoría de les veces esto solucionábase mediante refaxos de bayeta o enagües de llinu o algodón; cuantes más y más almidonaes se llevaren, más agüecaba la saya cimera y más ancha se vía la figura.
Magar que, había más coses. Delles veces atábase una toballa o cualquier otra pieza de tela enrollada alredor del cadril pa da-y mayor presencia y soporte a la saya , de manera que nun pingare d'atrás, al ser onde se concentraba la mayor parte del vuelu de la prenda. Tamién había artiluxos como'l que se ve na semeya de más abaxo, una especie de coxín a mou de polisón que, atáu con unes cintes a la cintura, y lleváu sobre la camisa, debaxo de toles sayes, facía-yos de sofitu a éstes y permitía-y al ama llevales de manera más airosa

Los indianos y la pedrería

Hai quien diz que fueron los indianos los qu'indroducieron los recargaos y a la vez elegantes y distinguíos adornos d'acebache bordáu (coral negru, en Llanes) nel traxe d'aldeana, sin embargu hai que tener en cuenta más coses:

• El traxe d'aldeana durante'l s. XIX ta fuertemente influenciáu pola moda de París, porque, como yá vimos en repitíes ocasiones yera un indumentu de clases acomodaes avezaes a siguir les modes.
  La moda victoriana, que fue la predominante hasta 1890 yera bastante austera n'adornos y colores, marcando la diferencia social les riques teles de seda, los drapeaos, volantes y cenciellos adornos de pasamanería.
  A partir de 1890 llega la Belle Epoque, un periodu de desendolque económicu ensin precedentes que tien el so espeyu tamién na moda. Les muyeres simplifiquen muncho más el so atuendu, siendo l'ideal de galanura la moza Gibson. Ponse de moda el traxe xastre, compuestu de brusa y saya entallada, y a esta simplificación de formes nel vistir acompáñala un gustu polos colores más claros y un arriquecimientu granible de los adornos bordaos en pedrería que duró hasta los años 20.
  
  Esto por supuestu afectó al traxe d'aldeana, que centró a partir d'entós el so lluxu nos bordaos de pedrería d'acebache en cuenta d'usar teles de más categoría qu'el pañu de llana, como la seda por exemplu. Con too, nunca se llegó d'aquella a formes con tantu abigarramientu como agora.
  
  
  
  
  Les sayes, como yá vimos nel post 1890's, pierden munchu vuelu, la chaquetiya llevaráse yá siempre sobro l'hombru izquierdu y nunca puesta y la chambra o brusa fadrá la so aparición, modificando a la camisa que perderá les mangues, pasando a ser una prenda interior nomada tamién saya.
• Los indianos son los nuevos ricos, la clase social con más puxu del momentu. Imiten les costumes de l'aristocracia, y como nun podía ser menos, visten a les sos fíes y muyeres colos meyores traxes d'aldeana del momentu, tanto en México como en Llanes. Pue dicise que los indianos introducieron la pedrería nos traxes o qu'espoxigaron económicamente na época na que la pedrería taba de moda. A mí gústame más velo d'esta segunda manera.
  
  
  
  Vemos nesta semeya un grupu d'aldeanes arrodiando un indianu en 1890, o polo menos ye lo que diz la referencia de "La foto y su Historia", espublizada va años pol periódicu El Oriente de Asturias. Llama l'atención que tovía siguen siendo traxes menos recargaos que los actuales y que les moces del primer términu lleven la chaquetilla a la derecha y les del fondo a la izquierda.
  
  
  
  
  
  
  

El costumismu na fotografía

Repasando les semeyes que fuimos güeyando del s. XIX, decatémonos de que les modelos suelen llevar nos retratos elementos que definen el so status social cuando visten un traxe d'aldeana: vimos esa diferenciación nes calidaes de los texíos y los adornos pero tamién en complementos como abanicos, xoyes, etc.
Tamién ye importante l'atrezzo, los decoraos, el mobiliariu qu'el fotógrafu escueye pa la ocasión. Hasta agora fuimos viendo que lo común yera la recreación nel estudiu de ricos salones con alfombres turques, butaques de tapicería abotonao y cortines de terciopelu; o de xardinos italianos con balaustrada y plantes...

Entráu el sieglu XX vemos cómo esta tendencia va camudando y les escenes costumistes van faciéndose ca vez más presentes, sustituyendo los abanicos y les poses señoriales por garabatos, gadaños y paxos, y los salones y xardinos por quintanes y portielles.

La semeya que vemos enriba, magar que ye de 1890, podemos considerala un poco precursora de tou esti movimientu. Vemos, sobre un decoráu que representa'l puertu de Llanes, una muyer, dos neñes y un chaval montaos nuna barca, sosteniendo los remos. La temática marinera, sin embargu, nun tuvo tanta importancia como la rural nes semeyes costumistes de les décades posteriores.

Les neñes visten traxes en colores claros, y la muyer, que curiosamente nun trai chaquetiya, lleva ún escuru, con xustiyu y dengue mui entallaos. El chaval lleva un traxe de branu y un canotier, mui de moda a finales del XIX.

La indumentaria de les clases populares

      Siempre que falemos de "traxes d'aldeana" refiriéndonos a los del sieglu XIX, hai que tener en cuenta que tamos tratando de prendes que solamente les clases altes podíen permitise. Les muyeres llanisques que teníen un status privilexáu, anque de vezu siguíen les Modes de París, gustaben n'ocasiones especiales de visitise al mou popular, diferenciándose d'él, eso sí, na calidá del xéneru y nos adornos colos qu'engalanaben los traxes.

Esti fenómenu tien l'orixe nuna corriente de finales del s. XVIII, el Majismo, que suponía la resistencia de los más acomodaos a vistise al mou francés, creando un estilu propiu basáu nel vistir popular y arraigando especialmente en Madrí. Cuando esta moda empieza a decayer entamáu'l XIX, llega'l Romanticismu y'l gustu polo popular vuelve a tar de moda. Hai que tener en cuenta que Llanes yera yá nel XIX destín turísticu preferente y llugar de veraneo de delles families que, si bien procedíen de la villa, teníen na capital la residencia habitual. L'amor romanticista polo exótico fai que les moces d'estes families alcuentren interesante'l vistise d'aldeana por un día, participar na fiesta, tocar el ramu, baillar el pericote,etc.
Surden nesi momentu los bandos de La Magdalena y San Roque, que compiten organizando les fiestes del branu: los primeros en xunetu y los segundos n'agostu, calteniendo esa tradición de "vistise d'aldeana".

Pasen los años y los traxes d'aldeana ca vez se paecen menos a los que lleven les aldeanes; los primeros van arriqueciéndose y faciendose más y más suntuosos, y los otros van incorporando nueves teles, cortes y prendes según se van democratizando les modes.

Si mos fixamos na semeya, yá de la segunda mitá del XIX, decatámonos de que la indumentaria de les muyeres va cambiando. Yá nun vemos que lleven la solitaria o dengue, sinón un mantu de cruciar al pechu. La madre lleva un xugón de manga ancha y puñu abotonáu, mientres que les fíes traen yá chambres d'algodón de tela a cuadros. El xustiyu pasó a ser prenda interior. La neña lleva una saya tamién en tela a cuadros d'algodón, pero distinto a lo de la chambra y ensin nengún tipu d'adornu aparente; la saya de la hermana mayor únicamente va adornada con llorcies feches na propia tela, casi de xuru pañu de llana. El mayor lluxu posiblemente se vea nos mandiles de la moza y la neña, adornaos con puntilles y terciopelos.
Ye curiosa la manera d'atar el pañuelu, más cenciella que l'actual al nun llevar llorcies.
El paisanu va vistíu a la manera moderna: pantalón llargu, xilecu ensin solapes y chamarra con cuellos baxos.

1890s

Les décades de 1890 y 1900 puen considerase como de transición ente los traxes d'aldeana del s. XIX, inspiraos na indumentaria tradicional, la que llevaben a diario les clases populares, y los del s. XX, más alloñaos d'ésta, más fosilizaos nuna idea única de cómo tien que ser el traxe d'aldeana y ensin dulda, muncho más recargaos d'adornos y bordaos.

Na década de 1890 les clases populares van abandonando a poco y a poco la indumentaria tradicional. La industrialización nesta dómina trexo l'abaratamientu de les teles d'algodón y la fabricación mecánica de xénero a gran escala acabó cola producción artesanal de la llana y'l llinu. Esta fabricación a gran escala acabó tamién coles peculiaridaes llocales nel vistir de los pueblos. Los más pudientes vistirán a la moda de París y Londres y los más probes tamién, pero con menos recursos, de mou que se dará cierta uniformidá en toa Europa y América.

Siguen utilizándose traxes d'aldeana de décades anteriores, pues ye pieza de munchu valir como pa descartalos, y la moda finisecular va marcando tendencia: figures encorsetaes, cintura apertada, pechu y cadril ensalzáu pero ensin pieces postices como en décades pasaes (miriñaques, polisones, etc.). La saya pierde munchísimu volume, faciendo la figura más esbelta.
Los adornos bordaos en pedrería tovía nun son omnipresentes y polo xeneral solo los lleven el dengue y'l mandil.

La semeya de más arriba préstame especialmente pola nitidez que tien, que permite apreciar tolos detalles. La rapaza lleva un traxe siguiendo la moda de la época. Xustiyu bien apertáu y saya de pocu vuelu, adornada con pasamanería o quiciaves agremán de pedrería y seis cintes de terciopelu, repitiéndose'l motivu na chaquetiya. El mandil lisu, rectagular, de seda claro, lleva tamién el mesmu adornu d'agremán y va ribetiáu con puntilla. La chambra tien puños con volante y'l dengue ta atarraquináu d'adornos de pasamanería y quiciaves pedrería.
Pañuelu, pendientes, gargantilla de terciopelu ensin medalla, collar con crucifixu, cadena y reló a la cintura completen el conxuntu. Ta datada en 1895.

Cómo datar semeyes antigües al traviés del peináu. Sieglu XIX

Nel sieglu XIX, les muyeres pertenecientes a clases populares en Llanes y tola zona oriental asturiana cubríen la cabeza con un pañuelu de tres picos (o cuatro, si ésti diba dobláu pela metada), que se cruciaba p'enriba la ñuca y atábase sobro la frente, como nel restu d'Asturies, y n'otres ocasiones, quiciaves pa mayor postín, sobro'l moñu. Esti últimu xeitu de ponelu fosilizó como "pañuelu d'aldeana" o "pañuelu de llanisca" y la so colocación fue colos años ritualizándose y faciéndose más complexa. Por embargu, el pañuelu atáu al moñu nun surdió esclusivamente en Llanes, viéndose dacuando n'otres partes del país y tamién ente les pasiegues o les vasques.

El pañuelu tapaba siempre'l pelo, ya que considerábase indecoroso que la muyer adulta lo mostrare en público.

Cuando les señorites empezaron a vistise d'aldeana, aparte de coser los traxes en fines teles y adornalos de terciopelos y pasamaneríes, aportaron el vezu d'adaptalos siempre a la moda burguesa imperante, como yá vimos anteriormente, y tamién el de dir peinaes a la moda, de mou que la colocación del pañuelu fue modificándose p'adaptase al peináu de cada dómina.

1850s

L'estilu que se llevaba a mediaos de sieglu yera de raya al mediu y mui apegáu a la cara, tapando les oreyes y moñu, xeneralmente sobro la ñuca.

1860s

El peináu nun varía abultablemente, les oreyes queden a la vista y los moños xuben un poco.

1870s

Produzse un cambiu importante na moda, llega la época del polisón y los moños treslládense a lo cimero de la tiesta, faciéndose polo xeneral grandes rodetes con pelo postizo.

1880s

El pelo sigue recoyéndose nel cocorote en moños más pequeños que na década anterior, xeneralmente de tipu italianu. Faen aparición los flecos y los rizos pequeños per tola parte superior de la cabeza

1890s

Lo más típico a finales de sieglu ye llevar un moñetu nel cocorote, y unes guedeyes cayendo sobro les vidayes, dando un fustaxe descudiáu.

A la hora de poner el pañuelu, ésti desplázase pa la parte de p'atrás de la cabeza pa permitir a la petimetra llucir peináu y a la vez poder vistise d'aldeana ensin dexar de dir a la moda.

A continuación pongo unos exemplos de cómo'l pañuelu s'adapta al peináu de les distintes modes decimonóniques.

Dómina de cambeos

Esta semeya amuésanos un grupu de xente de la década de los 70 del sieglu XIX y delles tipoloxíes nel vistir. Tamos nuna dómina de cambeos económicos económicos, sociales y políticos de vértigu, y los traxes de los asturianos faen eco d'eses tresformaciones:

• Los homes visten de traxe de xilecu, camisa blanca y americana; el pantalón desplazó al calzón curtiu, que s'emplega sólamente con usu identitariu, especialmente ente los emigraos a América; la montera cedió'l sitiu al sombreru cordobés.
  
  
• Ente les muyeres podemos ver tres tipos de indumentos:
  
  
  1. Traxes tradicionales, de chambra de color, mantu o pañuelu d'hombros, saya, pañuelu a la cabeza atáu a la candasina o enriba'l moñu -forma ésta bastante común en Llanes nos diis de fiesta-, amás de perendengues y gargantiyes.
     Vemos d'esta manera vistida a la señora sentada en primer términu y a les dos de la izquierda de la filera d'atrás del too.
     
     
  2. Traxes de chambra blanca, corpiñu y saya, según la moda de París de la época, pero muncho más modestos. El desendolque de la industria textil yá permitía la importación de teles d'algodón a baxu preciu. El xustiyu pasó a ser prienda interior asemeyada al corsé, pero ensin ballenes.
     Diríen asina vistíes la moza que tien un críu en cuello y la que-y posa la mano enriba l'hombru.
     
     
  3. Traxes d'aldeana, siguiendo la tipoloxía primitiva, de saya adornada con llorcies y terciopelos y chaquetiya de la mesma tela, mandil curtiu de terciopelu negro rematáu con pasamanería, igual que'l dengue. Nun -yos falten los pendientes, la gargantiya de cinta con medalla o camaféu y la llarga cadena col reló. D'esta traza vemos a les tres moces que tan de pie, mediu lladeaes en primer términu, y posiblemente tamién a la que ta más atrás a la mandrecha.

Vemos, entós, per una parte la indumentaria tradicional en retrocesu y per otra la moda que vien de París garrando ca vegada más puxu. Por contra, el traxe d'aldeana surde como un intentu de caltener y facer elegante una indumentaria en desusu y de xente humilde.

El vezu de poner la chaquetiya sobro l'hombru izquierdu

Ye una moda que fosiliza nesta dómina, la década de 1880, aproximadamente. Anteriormente, nos documentos fotográficos de los que tenemos conocimientu, la chaquetiya siempre va vistida.
Hai que tener en cuenta que les romeríes y les fiestes patronales yeren -y tovía son- principalmente nel branu, siendo la meyor ocasión pa llucir un traxe d'aldeana. El calor fai sobrar la chaquetilla y que les aldeanes se despriendan d'ella unes veces, y más comunmente que la doblen y la cuelguen sobro l'hombru izquierdu, pingando hacia alantre la manga izquierda y hacia atrás la derecha.
A partir de 1890 ye mui escepcional ver una aldeana cola chaqueta vistida.

Siguiendo cola semeya, continuamos analizando la indumentaria d'aquella gracies a la bayura de documentos gráficos disponibles.
La moza lleva un traxe de saya y chaquetiya feches na mesma tela y color, adornaes con cuatro cintes de terciopelu negro na saya y dos nel reborde de la chaquetiya. Ente les cintes de la chaquetiya lleva amás lo que paecen ser seis filigranes de pedrería, y esi mesmu motivu repítese na saya ente les cintes primera y segunda y tercera y cuarta.
El dengue, en terciopelu o bayeta negro, va ribetiáu por doble cinta de pasamanería de madroños.
La chambra, fecha probablemente n'algodón, remata les mangues nuna especie de puñu de puñeta.
El mandil, curtiu, rectagular, en rasu o otra tela de seda, lleva tres cintes de terciopelu negro bordeándolu, y como remate una tira d'encaxe.
Lo llargo de la saya nun mos dexa ver el tipu de zapatu que lleva la moza; igualmente'l pañuelu, al ponelu tan atrás malpenes se percibe.
Pa finar, como xoyes lleva unos pendientes, una cinta al pescuezu de la que pinga un camaféu, medalla o bixu, y tamién trai un broche zarrando l'escote del dengue y una llarguísima cadena con reló que, colingando del pescuezu, va a prendese a la cintura.

Una muyer y una neña

Década de 1860. Una madre y una fía, o dos hermanes, primes, o amigues... en definitiva, una muyer y una neña.

La muyer lleva el traxe d'aldeana con una chaquetiya en color más escuru que la saya y adornada con cinta de fleco bordeando pechera, cuellu y cintura, en cuenta d'usar formes más convencionales como la cinta terciopelu negro y los picos en ringo-rango.
La saya trai como únicu adornu dos llorcies y dos cintes fines escures, posiblemente de terciopelu.
El mandil, casi circular completamente, va bordáu con motivos vexetales y lleva una blonda d'encaxe alredor, rematándolu. Posiblemente tea fechu en seda.
El dengue, negru, quiciaves de bayeta, va rematáu con terciopelu del mesmu color en ringo-rango pel pescuezu, y en recto nel restu les partes, y lleva tamién apliques tresversales.
Media blanca, de llana o algodón y zapatu negru con pocu tacón.
Los adornos son ciertamente austeros, unos pendientes, una gargantiya y una cadena de la que pinga un reló que sostién na mano.

La neña viste a la moda burguesa de la época, con saya de miriñaque, y va peinada con raya al mediu y hacia atrás, amosando les oreyes, según se llevaba na década de 1860. Como curiosidá, na pechera lluz una caramba, una adornu típicu del XIX consistente nun llazu del que pingaba una medalla.

Un traxe de seda

Traxe de cultu pa tolos amantes de los traxes antiguos d'aldeana llanisca. Sigue a la perfección los modelos descritos anteriormente pa les décades de 1870 y 1880.

La saya y la chaquetiya tan feches probablemente en tafetán o dalguna tela de seda natural.
La disposición de los adornos ye al usu, pero non mui recargada. La saya lleva tres llorcies feches na mesma tela, nes que s'intercalen dos bandes d'una especie de pasamanería fecho a base de cinta fruncío, faciendo como una especie d'entellazos nel mesmu color que la saya.
La chaquetiya va rematada en puños, cuellu, cintura y pechera por cinta que posiblemente seya de la mesma tela na que ta confeccionada la prienda, o polo menos del mesmu color, asina como un motivu de pasamanería igual al mentáu pa la saya.

El dengue negru ye posiblemente de bayeta o terciopelu y va rematáu por una pasamanería de madroños, que si bien pue pensase que ye d'un color más claru, hai que tener en cuenta que ta ellaborao nun material distintu al restu la pieza, lo que nos pue llevar a enquivocaciones.

Apruciendo perbaxo'l dengue vemos el xustiyu en color blancu o otru mui claru, pero que nun coincide col del mandil, curtiu, de rasu y rematáu con tres cintes de pasamanería escures. El color del mandil ye más claru que'l del traxe.

Lleva zapatu escotáu con un pocoñín de tacón y media blanca d'algodón, pañuelu atáu enriba'l moñu (qu'entá nun se llevaba escesivamente altu) y como alfayes unes arrecaes y una cinta escura de gargantiya, de la que pinga un crucifixu. Na mano, un abanicu.

El fustaxe xeneral tanto del traxe como de la composición de la semeya tien pincelaes de majismo; nun hai qu'escaecer l'orixe común del traxe d'aldeana y'l de maja como traxes aristocráticos d'inspiración popular.



















Dos exemplos de traxes de maja, ún del s. XVIII (a la manzorga) y otru del XIX (a la mandrecha)

Traxe escuru

Esta vez vemos un traxe d'escontra 1870-1880 en color escuru. La composición nun presenta grandes novedaes respecto a otres espublizaes anteriormente: trátase d'una semeya d'estudiu, con decoraos que recuerden un espaciu elegante (xardinos, una barganera), que xunto al abanicu que lleva la modelo danmos la sensación de tar énte una dama de clase social acomodada y non énte una "aldeana".

La saya va adornada con cinco cintes de terciopelu negro, tela na que probablemente tea tamién fechu'l mandil, que va rematáu con cenefa de material impreciso.
La chaquetiya, nel mesmu color que la saya, va rematada con doble cinta de terciopelu en puños, pechera, cuellu y cintura. Lo escuro del traxe y la postura de cantu de la moza nun mos permiten ver munchos más detalles. Llama l'atención el reló que con llarguísima cadena cuelga del pescuezu, baxando a prendese na cintura, enriba'l mandil.

La banda. El traxe de les hermanes Borbolla

La banda ye una cinta más o menos ancho de seda o rasu que s'ata a ún de los cabos del mandil, sobro'l cadril drechu. Los colores son mui variaos y coinciden col del pañuelu, mandil y xustiyu, magar qu'antaño nun tenía por qué ser d'esta manera necesariamente. Delles veces les bandes puen dir bordaes o llevar los cabos remataos por un fleco.
Si bien ye cierto qu'anguaño s'usa siempre, antiguamente nun yera asina y son poques les semeyes decimonóniques nes qu'apaez. Eso nun quier dicir que seya un aporte posterior al traxe d'aldeana, simplemente nun yera pieza omnipresente daquella.




Les moces que posen pa les fotografíes son Escolástica Borbolla y la so hermana pequeña, Josefa, orixinaries de Puertas de Cabrales, anque vivíen en Madrí. La primera nació en 1837 y fue madre d'Elvira Rojo Borbolla (la neña del traxe a cuadros) y del fotógrafu Miguel Rojo Borbolla.

Les semeyes cuento que sedrán d'escontra 1860, les dos visten el mesmu traxe con saya de munchu vuelu con miriñaque, adornada con cinta fruncío intercalao con cintes de terciopelu negro, mandil cuadráu mui cenciellu, chaquetiya con adornos asemeyaos a los de la saya, dengue que nun ye negru y pañuelu en color claru. Escolástica, amás lleva una banda llisa nun color claru.

Familia de Po

Nun quería empezar a comentar esta semeya ensin comparala cola espublizada nesti blog en diciembre de 2009. Examinando les dos imáxenes éntrenme duldes de si sedrá la mesma familia depués de trenta años, y sobre too si'l traxe de la madre ye'l mesmu. Aparentemente paez que sí.

Analizando los traxes de les muyeres qu'equí vemos retrataes pue dicise que les dos lleven traxes d'aldeana según la tipoloxía más antigua de la que tenemos constancia fotográfica (anteriores a 1880), caracterizaos por:

• Dengues (solitarias en Llanes) fechos en pañete o bayeta negro, tafetán de seda o rasu pa los más ostentosos, ensin nengún tipu de bordáu en pedrería, agremán o pasamanería, adornaos únicamente nos rebordes por terciopelu negro. Escepcionalmente ésti pue sustituyise por otru material, como ye'l casu que nos ocupa, onde vemos qu'el de la madre va rematáu por una especie de cinta de llunares que nun se barrunta mui bien.
  
  
• Chaquetiyes vistíes, porque esa ye la so funcionalidá, con adornos picaos en terciopelu negro a lo llargo del cuellu y solapa, además d'otros en cinta lliso del mesmu material pa cintura y puños. Los adornos en ringo-rango puen sustituyise por cinta simple o doble de terciopelu negro, anque vemos nesta semeya que la moza llévala nun color claru.
  
  
• Sayes de munchísimu vuelu, feches siempre en pañu de llana lo más fino posible pa poder aguantar bien el pesu, adornaes únicamente con llorcies y cintes de terciopelu negro, y puestes sobre refaxos de bayeta y enagües de llinu almidonaes, buscando da-y mayor volume a la saya.
  
  
• Mandiles siempre curtios yá fueren cuadraos o redondos, adornaos los primeros con llorcies y cintes de terciopelu, y los segundos a veces con volantes y cintes fines de pasamanería.
  
  
• Pañuelos ataos de manera muncho más cenciella que l'actual, ensin llorcies y simplemente añudaos enriba moñu depués de cruzase na ñuca. Esta forma permaneció mientres les muyeres se peinaben con moñu baxu. A partir de la década de 1870 y sobre too la de 1880 los moños llévense altos y pónense de moda flecos y rizos, obligando a cambiar la fisonomía del pañuelu nel traxe d'aldeana.

L'home lleva xilecu de pañu con solapes y chaqueta vistida con collete de terciopelu, pantalón llargu y botín. Nun se distingue si lleva faxa o non.

Los colores

El color del traje es un punto muy discutido en los últimos tiempos. Predominaron granates y tonos de gama marrón, desde el color avellana hasta el propio marrón oscuro, los grises y los verdes. El traje de color negro es de reciente incorporación. Las telas sobre las que se trabajaban, sarga, lana, merino, paño, etc., no tenían que ser precisamente lisas, pudiendo presentar dibujos en forma de flores, canalillos, aguas, etc., contando incluso con aquellos trajes que se trabajaban sobre vistosas telas de cuadros.

Mª Felisa Santoveña Zapatero, "La indumentaria popular en el concejo de Llanes" Temas Llanes nº52, El Oriente de Asturias, Llanes, 1990.


Si queremos falar de los colores de los antiguos traxes d'aldeana la fotografía nun nos sirve de muncha ayuda al ser en blanco y negro. Lo ideal sedría, por supuesto, disponer de pieces antigües. Sicasí, puen deducise delles coses:

1- Los traxes d'aldeana, como yá comenté anteriormente, son de mano "imitaciones" que llevaben les moces pudientes de la ropa que trayíen les clases más modestes, les "aldeanes", pa participar d'esta manera nos ritos populares. Camiento que tamién intentaríen imitar los colores d'éstos, que sedríen en primer llugar los pardos en distintes tonalidaes según el color natural de la llana, asina como los que se sacaben de tintes caseros relativamente asequibles, como amarillentos y anaranxaos, verduzcos y marrones.

2- Al ser un traxe burgués, el traxe d'aldeana recibe siempre la influencia de la moda de París, que na segunda metá del XIX gusta de tonos sobrios como'l marrón, el gris, el granate, l'azul escuru o'l violeta. El coloráu, tinte caru de mano, acaba popularizándose tanto que na Inglaterra victoriana táchase de vulgar y nun casa colos gustos de la moda del momentu.

3- El negru, que Santoveña afirma que ye de reciente incorporación, enxamás sedría usáu antiguamente por ser el color del llutu, y por ello impropiu d'un día festivu.


Nel cartel de propaganda de dulce "La cooperativa española", de 1900, vese una ilustración d'una aldeana y un porruanu. Ella lleva un traxe marrón combináu con coloráu. Ignoro cuándo surde'l vezu de llevar mandil, xustiyu, pañuelu y banda nun mesmu color.

Na semeya que pongo darréu vense traxes actuales en colores acertaos.



Aparte de los traxes de tela a cuadros, que yá comentemos anteriormente, vemos na semeya de más abaxo una tela de florines pa la saya distinta a la de la chaquetiya, adornada por llorcies y cintes de terciopelu.
La moza lleva un dengue de seda o pañete con adornos picaos de terciopelu en ringo-rango nel escote y una chaquetiya colgada del brazu izquierdu adornada na solapa col mesmu motivu y con tira ancha de terciopelu a la cintura. Lleva un mandil claru con motivos vistosos que contrasta col restu'l traxe, que se ve más escuru. Como calzáu, zapatos a la moda.
El traxe cuento que ye d'ente les décades de 1870 y 1880 y nun se -y aprecia nengún tipu de pasamanería nin agremanes. El peináu tamién ye característicu d'esa dómina.

La pasamanería

La moda del polisón supón un cambiu importante na silueta femenina del últimu cuartu del sieglu XIX; les sayes qu'antes yeren desaxeradamente abultaes, gracies a les crinolines o a les munches inagües y refaxos que se poníen debaxo, gusten agora de llevase estilizaes, independientemente de que lleven o non polisón y cola. Tamién apaez ciertu gustu por adornar los vistíos con draperíes, cintes y puntilles, en contraposición al sobriu estilu de mediaos de sieglu.
Esta moda algama tamién a los traxes d'aldeana llanisca, llenando los dengues y mandiles de cintes de pasamanería y agremán. Los bordaos de coral negru, especialmente na saya y la chaquetiya, son muncho más recientes.

La moza de la semeya va peinada al estilu de los años 80 - 90 y trai un pañuelu atáu "a la llanisca". Lleva una chambra con puños de volante y un xustiyu de tela de tapicería o adamascao. El dengue y el mandil, en terciopelu negro, van orniaos por una pasamanería d'entellazos en color claru y remataos con "madroños", igual que la chaquetiya. Curiosamente ésta ta fecha en terciopelu negro y nun ye del mesmu material nin color que la saya, que ye de pañu claro (beige, mariellu...) y va adornada con tres cintes anches de terciopelu negro. Seguramente vaiga calzada de zapatu negru y como complementu trai un collar de cuentes de tres vueltes y unos pendientes de llárimes que posiblemente seyan de coral colloráu.

Traxes de tela a cuadros

"El traje de las mujeres artesanas, y de las medianamente acomodadas, lo mismo que el de las labradoras hasta el primer tercio del presente siglo (XIX), consistía en camisa y enagua de cáñamo o lino, justillo de tela pintada, refajo de bayeta, basquiña (saya) y jubón de sayal, sayalín o estameña, dengue de bayeta más fina llamada miliquín y pañuelo de hilo o algodón para la cabeza atado al moño, calzas o medias de lino o lana, corizas o zapato escotado y un mandil de lienzo o percal pintado. La basquiña nunca bajaba más de 15 o 20 centímetros hasta la planta del pie. Todo el género de lana o cáñamo y lino que constituía estas prendas era cosechado en el país.

Aquel traje peculiar del país, que en todo el mundo era conocido como llanisco-asturiano, sólo se gasta hoy por algunas jóvenes como disfraz en romerías y fiestas populares, pero compuesto de costosas telas y ricos adornos, que cuadran mal con su primitiva sencillez y las naturales gracias de la mujer".

Manuel García Mijares, Apuntes histórico-Genealógicos y Biográficos de Llanes y sus hombres, 1893.

Nesti textu de finales del sieglu XIX yá se fai una clara distinción ente los traxes que llevaben les muyeres pertenecientes a clases populares (llabradores, artesanes) - del que yá falaré con más calma otru día- y los traxes d'aldeana, de los que l'autor diz que son disfraces qu'imiten a los anteriores.

Pa Miyares los primeros yá tan desaniciaos nesa dómina (1893). Anguaño tendríemos que falar d'unos traxes de transición ente la indumentaria tradicional de principios del XIX y la que resulta de la "democratización" de la moda burguesa a lo cabero'l sieglu.

Nestes semeyes d'a lo último la centuria vemos traxes d'aldeana fechos en tela a cuadros seguramente d'algodón. Esti material, motor del desendolque industrial no tocante a la industria textil, pasó de ser un xéneru exóticu na Europa del XVIII que solo los más pudientes podíen permitise, a espardese'l so usu, gracies a la mecanización de la producción, ente toles clases sociales nes décades finales del sieglu siguiente. Esti espardimientu trexo como novedá la popularización de teles estampaes, a cuadros, con florines o de llunares.

Pa Miyares, estes innovaciones nun faen sinon convertir el traxe d'aldeana en disfraz, al ser éstes teles costoses que según él cuadran mal con su primitiva sencillez.

Gracies a Von Aisaider pola semeya d'esta neña

El mesmu traxe

Delles veces los traxes yá fuere pol eleváu preciu o pol pocu usu que se -yos llegaba a dar emprestábense y heredábense. Por eso topamos el mesmu modelo en varies semeyes.
Tampoco nun se pue descartar que'l propietariu fuere'l propiu fotógrafu, de mou que cualquier moza pudiere retratase vistida d'aldeana.

Pa una descripción detallada del traxe ver lo espublizao el 4 de mayu de 2.009, onde comento otra semeya del mesmu.

El miriñaque (II)

Falando de moda burguesa, a partir de la década de 1830, les sayes van ganando ca vez más amplitú; p'acampanales a lo primero poníen enagua sobro enagua, y tamién crinolines, enagues de llino endurecío con tires de crin de burru cosíes pa faceles más ríxides.

A mediaos de la década de 1850 la emperatriz de Francia Eugenia de Montijo punxo de moda'l miriñaque, un aparatu novedosu y estravagante, consistente nunos aros d'acero flexible pero indeformable xuníos per unes tires de tela, que permitíen acampanar les sayes hasta lo inimaxinable y allixerar el pesu de tanta enagua, que dexa de ser necesaria.



Pa la segunda metá de los años 60 del XIX el miriñaque va evolucionando y dexa de ser circular p'adoptar una forma elíptica, dexando les sayes baxar casi en recto per delantre y faciendo una gran cola per detrás, que va ser l'antecesora de los polisones de los 70.



Volviendo a la semeya del principiu vemos cómo la moza lleva un traxe d'aldeana con miriñaque. Sobra volver a dicir qu'estos traxes "d'aldeana" nun son precisamente les aldeanes les que los visten, y polo tanto adáptense a la moda del momentu.

Ye difícil saber si tamos énte un miriñaque redondu o elípticu; lo más probable ye que seya redondu porque a les dames que lleven miriñaques elípticos suel gusta-yos restratase de perfil pa llucir la cola. Otra manera, el pelo tapando les oreyes tamién suel ser característico de los peinaos anteriores a 1865.

El traxe ye cenciellu, la saya lleva como adornu tres grupos de tres cintes de terciopelu caún, la chaquetiya y el dengue adornos picaos en ringo-rango y tres cintes nos puños. El mandil, mui estrenchu a la cintura, lleva un motivu mui simple bordau alredor y una especie de blonda rematándolu. Unes cadenes, un broche y unos pendientes completen los adornos.




Nesta semeya, la emperatriz Carlota de México amosando l'ampulosidá que llegaron a algamar los vistíos con miriñaque (1864).

Otru exemplu de traxe simple

Peinaos como esti, de moñu altu, ensin flecos nin tupés, enmarcaos por grandes rodetes postizos punxéronse de moda na década de 1870.
El traxe que lleva la moza ye de pañu. La saya tien munchísimu vuelu, y seguramente lleva debaxo un refaxu o más pa da-y más volume. Pa engalanala punxéron-y seis cintes de terciopelu en color claru o seda, enmarcaes en dos llorcies, una perriba y otra per baxo.

La mesma cinta usóse pa orniar los puños, cuellu, solapes y cintura de la chaquetiya, que llama l'atención pola amplitú de les mangues.

Lleva un dengue negru rematáu con cinta de pasamanería y mandil cuadráu, posiblemente de terciopelu escuru, adornáu con tres cintes de pasamanería o llabraes. Tres de la cinta más interior, na esquina inferior izquierda (y probablemente na drecha tamién, anque nun se vea) lleva un motivu floral/vexetal bordáu. Lleva dalgún tipu de fleque na parte baxo pa rematalu.

Detrás del rodete postizu lleva el pañuelu que casi nin s'atalanta. Como xoyes lleva pendientes, gargantiella de cinta con bixu y broche nel dengue.