EL TRAXE D'ALDEANA

1890s

2011-12-30T11:40:00.006+01:00

Les décades de 1890 y 1900 puen considerase como de transición ente los traxes d'aldeana del s. XIX, inspiraos na indumentaria tradicional, la que llevaben a diario les clases populares, y los del s. XX, más alloñaos d'ésta, más fosilizaos nuna idea única de cómo tien que ser el traxe d'aldeana y ensin dulda, muncho más recargaos d'adornos y bordaos.

Na década de 1890 les clases populares van abandonando a poco y a poco la indumentaria tradicional. La industrialización nesta dómina trexo l'abaratamientu de les teles d'algodón y la fabricación mecánica de xénero a gran escala acabó cola producción artesanal de la llana y'l llinu. Esta fabricación a gran escala acabó tamién coles peculiaridaes llocales nel vistir de los pueblos. Los más pudientes vistirán a la moda de París y Londres y los más probes tamién, pero con menos recursos, de mou que se dará cierta uniformidá en toa Europa y América.

Siguen utilizándose traxes d'aldeana de décades anteriores, pues ye pieza de munchu valir como pa descartalos, y la moda finisecular va marcando tendencia: figures encorsetaes, cintura apertada, pechu y cadril ensalzáu pero ensin pieces postices como en décades pasaes (miriñaques, polisones, etc.). La saya pierde munchísimu volume, faciendo la figura más esbelta.
Los adornos bordaos en pedrería tovía nun son omnipresentes y polo xeneral solo los lleven el dengue y'l mandil.

La semeya de más arriba préstame especialmente pola nitidez que tien, que permite apreciar tolos detalles. La rapaza lleva un traxe siguiendo la moda de la época. Xustiyu bien apertáu y saya de pocu vuelu, adornada con pasamanería o quiciaves agremán de pedrería y seis cintes de terciopelu, repitiéndose'l motivu na chaquetiya. El mandil lisu, rectagular, de seda claro, lleva tamién el mesmu adornu d'agremán y va ribetiáu con puntilla. La chambra tien puños con volante y'l dengue ta atarraquináu d'adornos de pasamanería y quiciaves pedrería.
Pañuelu, pendientes, gargantilla de terciopelu ensin medalla, collar con crucifixu, cadena y reló a la cintura completen el conxuntu. Ta datada en 1895.

Cómo datar semeyes antigües al traviés del peináu. Sieglu XIX

2011-10-20T17:02:00.011+02:00

Nel sieglu XIX, les muyeres pertenecientes a clases populares en Llanes y tola zona oriental asturiana cubríen la cabeza con un pañuelu de tres picos (o cuatro, si ésti diba dobláu pela metada), que se cruciaba p'enriba la ñuca y atábase sobro la frente, como nel restu d'Asturies, y n'otres ocasiones, quiciaves pa mayor postín, sobro'l moñu. Esti últimu xeitu de ponelu fosilizó como "pañuelu d'aldeana" o "pañuelu de llanisca" y la so colocación fue colos años ritualizándose y faciéndose más complexa. Por embargu, el pañuelu atáu al moñu nun surdió esclusivamente en Llanes, viéndose dacuando n'otres partes del país y tamién ente les pasiegues o les vasques.

El pañuelu tapaba siempre'l pelo, ya que considerábase indecoroso que la muyer adulta lo mostrare en público.

Cuando les señorites empezaron a vistise d'aldeana, aparte de coser los traxes en fines teles y adornalos de terciopelos y pasamaneríes, aportaron el vezu d'adaptalos siempre a la moda burguesa imperante, como yá vimos anteriormente, y tamién el de dir peinaes a la moda, de mou que la colocación del pañuelu fue modificándose p'adaptase al peináu de cada dómina.

1850s

L'estilu que se llevaba a mediaos de sieglu yera de raya al mediu y mui apegáu a la cara, tapando les oreyes y moñu, xeneralmente sobro la ñuca.

1860s

El peináu nun varía abultablemente, les oreyes queden a la vista y los moños xuben un poco.

1870s

Produzse un cambiu importante na moda, llega la época del polisón y los moños treslládense a lo cimero de la tiesta, faciéndose polo xeneral grandes rodetes con pelo postizo.

1880s

El pelo sigue recoyéndose nel cocorote en moños más pequeños que na década anterior, xeneralmente de tipu italianu. Faen aparición los flecos y los rizos pequeños per tola parte superior de la cabeza

1890s

Lo más típico a finales de sieglu ye llevar un moñetu nel cocorote, y unes guedeyes cayendo sobro les vidayes, dando un fustaxe descudiáu.

A la hora de poner el pañuelu, ésti desplázase pa la parte de p'atrás de la cabeza pa permitir a la petimetra llucir peináu y a la vez poder vistise d'aldeana ensin dexar de dir a la moda.

A continuación pongo unos exemplos de cómo'l pañuelu s'adapta al peináu de les distintes modes decimonóniques.

Dómina de cambeos

2011-07-28T15:56:00.007+02:00

Esta semeya amuésanos un grupu de xente de la década de los 70 del sieglu XIX y delles tipoloxíes nel vistir. Tamos nuna dómina de cambeos económicos económicos, sociales y políticos de vértigu, y los traxes de los asturianos faen eco d'eses tresformaciones:

Los homes visten de traxe de xilecu, camisa blanca y americana; el pantalón desplazó al calzón curtiu, que s'emplega sólamente con usu identitariu, especialmente ente los emigraos a América; la montera cedió'l sitiu al sombreru cordobés.
Ente les muyeres podemos ver tres tipos de indumentos:
1. Traxes tradicionales, de chambra de color, mantu o pañuelu d'hombros, saya, pañuelu a la cabeza atáu a la candasina o enriba'l moñu -forma ésta bastante común en Llanes nos diis de fiesta-, amás de perendengues y gargantiyes.
  Vemos d'esta manera vistida a la señora sentada en primer términu y a les dos de la izquierda de la filera d'atrás del too.
2. Traxes de chambra blanca, corpiñu y saya, según la moda de París de la época, pero muncho más modestos. El desendolque de la industria textil yá permitía la importación de teles d'algodón a baxu preciu. El xustiyu pasó a ser prienda interior asemeyada al corsé, pero ensin ballenes.
  Diríen asina vistíes la moza que tien un críu en cuello y la que-y posa la mano enriba l'hombru.
3. Traxes d'aldeana, siguiendo la tipoloxía primitiva, de saya adornada con llorcies y terciopelos y chaquetiya de la mesma tela, mandil curtiu de terciopelu negro rematáu con pasamanería, igual que'l dengue. Nun -yos falten los pendientes, la gargantiya de cinta con medalla o camaféu y la llarga cadena col reló. D'esta traza vemos a les tres moces que tan de pie, mediu lladeaes en primer términu, y posiblemente tamién a la que ta más atrás a la mandrecha.

Vemos, entós, per una parte la indumentaria tradicional en retrocesu y per otra la moda que vien de París garrando ca vegada más puxu. Por contra, el traxe d'aldeana surde como un intentu de caltener y facer elegante una indumentaria en desusu y de xente humilde.

El vezu de poner la chaquetiya sobro l'hombru izquierdu

2011-04-08T10:50:00.004+02:00

Ye una moda que fosiliza nesta dómina, la década de 1880, aproximadamente. Anteriormente, nos documentos fotográficos de los que tenemos conocimientu, la chaquetiya siempre va vistida.
Hai que tener en cuenta que les romeríes y les fiestes patronales yeren -y tovía son- principalmente nel branu, siendo la meyor ocasión pa llucir un traxe d'aldeana. El calor fai sobrar la chaquetilla y que les aldeanes se despriendan d'ella unes veces, y más comunmente que la doblen y la cuelguen sobro l'hombru izquierdu, pingando hacia alantre la manga izquierda y hacia atrás la derecha.
A partir de 1890 ye mui escepcional ver una aldeana cola chaqueta vistida.

Siguiendo cola semeya, continuamos analizando la indumentaria d'aquella gracies a la bayura de documentos gráficos disponibles.
La moza lleva un traxe de saya y chaquetiya feches na mesma tela y color, adornaes con cuatro cintes de terciopelu negro na saya y dos nel reborde de la chaquetiya. Ente les cintes de la chaquetiya lleva amás lo que paecen ser seis filigranes de pedrería, y esi mesmu motivu repítese na saya ente les cintes primera y segunda y tercera y cuarta.
El dengue, en terciopelu o bayeta negro, va ribetiáu por doble cinta de pasamanería de madroños.
La chambra, fecha probablemente n'algodón, remata les mangues nuna especie de puñu de puñeta.
El mandil, curtiu, rectagular, en rasu o otra tela de seda, lleva tres cintes de terciopelu negro bordeándolu, y como remate una tira d'encaxe.
Lo llargo de la saya nun mos dexa ver el tipu de zapatu que lleva la moza; igualmente'l pañuelu, al ponelu tan atrás malpenes se percibe.
Pa finar, como xoyes lleva unos pendientes, una cinta al pescuezu de la que pinga un camaféu, medalla o bixu, y tamién trai un broche zarrando l'escote del dengue y una llarguísima cadena con reló que, colingando del pescuezu, va a prendese a la cintura.

Una muyer y una neña

2011-01-28T12:24:00.005+01:00

Década de 1860. Una madre y una fía, o dos hermanes, primes, o amigues... en definitiva, una muyer y una neña.

La muyer lleva el traxe d'aldeana con una chaquetiya en color más escuru que la saya y adornada con cinta de fleco bordeando pechera, cuellu y cintura, en cuenta d'usar formes más convencionales como la cinta terciopelu negro y los picos en ringo-rango.
La saya trai como únicu adornu dos llorcies y dos cintes fines escures, posiblemente de terciopelu.
El mandil, casi circular completamente, va bordáu con motivos vexetales y lleva una blonda d'encaxe alredor, rematándolu. Posiblemente tea fechu en seda.
El dengue, negru, quiciaves de bayeta, va rematáu con terciopelu del mesmu color en ringo-rango pel pescuezu, y en recto nel restu les partes, y lleva tamién apliques tresversales.
Media blanca, de llana o algodón y zapatu negru con pocu tacón.
Los adornos son ciertamente austeros, unos pendientes, una gargantiya y una cadena de la que pinga un reló que sostién na mano.

La neña viste a la moda burguesa de la época, con saya de miriñaque, y va peinada con raya al mediu y hacia atrás, amosando les oreyes, según se llevaba na década de 1860. Como curiosidá, na pechera lluz una caramba, una adornu típicu del XIX consistente nun llazu del que pingaba una medalla.

Un traxe de seda

2010-12-17T13:50:00.018+01:00

Traxe de cultu pa tolos amantes de los traxes antiguos d'aldeana llanisca. Sigue a la perfección los modelos descritos anteriormente pa les décades de 1870 y 1880.

La saya y la chaquetiya tan feches probablemente en tafetán o dalguna tela de seda natural.
La disposición de los adornos ye al usu, pero non mui recargada. La saya lleva tres llorcies feches na mesma tela, nes que s'intercalen dos bandes d'una especie de pasamanería fecho a base de cinta fruncío, faciendo como una especie d'entellazos nel mesmu color que la saya.
La chaquetiya va rematada en puños, cuellu, cintura y pechera por cinta que posiblemente seya de la mesma tela na que ta confeccionada la prienda, o polo menos del mesmu color, asina como un motivu de pasamanería igual al mentáu pa la saya.

El dengue negru ye posiblemente de bayeta o terciopelu y va rematáu por una pasamanería de madroños, que si bien pue pensase que ye d'un color más claru, hai que tener en cuenta que ta ellaborao nun material distintu al restu la pieza, lo que nos pue llevar a enquivocaciones.

Apruciendo perbaxo'l dengue vemos el xustiyu en color blancu o otru mui claru, pero que nun coincide col del mandil, curtiu, de rasu y rematáu con tres cintes de pasamanería escures. El color del mandil ye más claru que'l del traxe.

Lleva zapatu escotáu con un pocoñín de tacón y media blanca d'algodón, pañuelu atáu enriba'l moñu (qu'entá nun se llevaba escesivamente altu) y como alfayes unes arrecaes y una cinta escura de gargantiya, de la que pinga un crucifixu. Na mano, un abanicu.

El fustaxe xeneral tanto del traxe como de la composición de la semeya tien pincelaes de majismo; nun hai qu'escaecer l'orixe común del traxe d'aldeana y'l de maja como traxes aristocráticos d'inspiración popular.

Dos exemplos de traxes de maja, ún del s. XVIII (a la manzorga) y otru del XIX (a la mandrecha)

Traxe escuru

2010-11-30T11:19:00.003+01:00

Esta vez vemos un traxe d'escontra 1870-1880 en color escuru. La composición nun presenta grandes novedaes respecto a otres espublizaes anteriormente: trátase d'una semeya d'estudiu, con decoraos que recuerden un espaciu elegante (xardinos, una barganera), que xunto al abanicu que lleva la modelo danmos la sensación de tar énte una dama de clase social acomodada y non énte una "aldeana".

La saya va adornada con cinco cintes de terciopelu negro, tela na que probablemente tea tamién fechu'l mandil, que va rematáu con cenefa de material impreciso.
La chaquetiya, nel mesmu color que la saya, va rematada con doble cinta de terciopelu en puños, pechera, cuellu y cintura. Lo escuro del traxe y la postura de cantu de la moza nun mos permiten ver munchos más detalles. Llama l'atención el reló que con llarguísima cadena cuelga del pescuezu, baxando a prendese na cintura, enriba'l mandil.

La banda. El traxe de les hermanes Borbolla

2010-10-19T13:45:00.016+02:00

La banda ye una cinta más o menos ancho de seda o rasu que s'ata a ún de los cabos del mandil, sobro'l cadril drechu. Los colores son mui variaos y coinciden col del pañuelu, mandil y xustiyu, magar qu'antaño nun tenía por qué ser d'esta manera necesariamente. Delles veces les bandes puen dir bordaes o llevar los cabos remataos por un fleco.
Si bien ye cierto qu'anguaño s'usa siempre, antiguamente nun yera asina y son poques les semeyes decimonóniques nes qu'apaez. Eso nun quier dicir que seya un aporte posterior al traxe d'aldeana, simplemente nun yera pieza omnipresente daquella.

Les moces que posen pa les fotografíes son Escolástica Borbolla y la so hermana pequeña, Josefa, orixinaries de Puertas de Cabrales, anque vivíen en Madrí. La primera nació en 1837 y fue madre d'Elvira Rojo Borbolla (la neña del traxe a cuadros) y del fotógrafu Miguel Rojo Borbolla.

Les semeyes cuento que sedrán d'escontra 1860, les dos visten el mesmu traxe con saya de munchu vuelu con miriñaque, adornada con cinta fruncío intercalao con cintes de terciopelu negro, mandil cuadráu mui cenciellu, chaquetiya con adornos asemeyaos a los de la saya, dengue que nun ye negru y pañuelu en color claru. Escolástica, amás lleva una banda llisa nun color claru.

Familia de Po

2010-09-15T12:29:00.010+02:00

Nun quería empezar a comentar esta semeya ensin comparala cola espublizada nesti blog en diciembre de 2009. Examinando les dos imáxenes éntrenme duldes de si sedrá la mesma familia depués de trenta años, y sobre too si'l traxe de la madre ye'l mesmu. Aparentemente paez que sí.

Analizando los traxes de les muyeres qu'equí vemos retrataes pue dicise que les dos lleven traxes d'aldeana según la tipoloxía más antigua de la que tenemos constancia fotográfica (anteriores a 1880), caracterizaos por:

Dengues (solitarias en Llanes) fechos en pañete o bayeta negro, tafetán de seda o rasu pa los más ostentosos, ensin nengún tipu de bordáu en pedrería, agremán o pasamanería, adornaos únicamente nos rebordes por terciopelu negro. Escepcionalmente ésti pue sustituyise por otru material, como ye'l casu que nos ocupa, onde vemos qu'el de la madre va rematáu por una especie de cinta de llunares que nun se barrunta mui bien.
Chaquetiyes vistíes, porque esa ye la so funcionalidá, con adornos picaos en terciopelu negro a lo llargo del cuellu y solapa, además d'otros en cinta lliso del mesmu material pa cintura y puños. Los adornos en ringo-rango puen sustituyise por cinta simple o doble de terciopelu negro, anque vemos nesta semeya que la moza llévala nun color claru.
Sayes de munchísimu vuelu, feches siempre en pañu de llana lo más fino posible pa poder aguantar bien el pesu, adornaes únicamente con llorcies y cintes de terciopelu negro, y puestes sobre refaxos de bayeta y enagües de llinu almidonaes, buscando da-y mayor volume a la saya.
Mandiles siempre curtios yá fueren cuadraos o redondos, adornaos los primeros con llorcies y cintes de terciopelu, y los segundos a veces con volantes y cintes fines de pasamanería.
Pañuelos ataos de manera muncho más cenciella que l'actual, ensin llorcies y simplemente añudaos enriba moñu depués de cruzase na ñuca. Esta forma permaneció mientres les muyeres se peinaben con moñu baxu. A partir de la década de 1870 y sobre too la de 1880 los moños llévense altos y pónense de moda flecos y rizos, obligando a cambiar la fisonomía del pañuelu nel traxe d'aldeana.

L'home lleva xilecu de pañu con solapes y chaqueta vistida con collete de terciopelu, pantalón llargu y botín. Nun se distingue si lleva faxa o non.

Los colores

2010-08-03T11:23:00.008+02:00

El color del traje es un punto muy discutido en los últimos tiempos. Predominaron granates y tonos de gama marrón, desde el color avellana hasta el propio marrón oscuro, los grises y los verdes. El traje de color negro es de reciente incorporación. Las telas sobre las que se trabajaban, sarga, lana, merino, paño, etc., no tenían que ser precisamente lisas, pudiendo presentar dibujos en forma de flores, canalillos, aguas, etc., contando incluso con aquellos trajes que se trabajaban sobre vistosas telas de cuadros.

Mª Felisa Santoveña Zapatero, "La indumentaria popular en el concejo de Llanes" Temas Llanes nº52, El Oriente de Asturias, Llanes, 1990.

Si queremos falar de los colores de los antiguos traxes d'aldeana la fotografía nun nos sirve de muncha ayuda al ser en blanco y negro. Lo ideal sedría, por supuesto, disponer de pieces antigües. Sicasí, puen deducise delles coses:

1- Los traxes d'aldeana, como yá comenté anteriormente, son de mano "imitaciones" que llevaben les moces pudientes de la ropa que trayíen les clases más modestes, les "aldeanes", pa participar d'esta manera nos ritos populares. Camiento que tamién intentaríen imitar los colores d'éstos, que sedríen en primer llugar los pardos en distintes tonalidaes según el color natural de la llana, asina como los que se sacaben de tintes caseros relativamente asequibles, como amarillentos y anaranxaos, verduzcos y marrones.

2- Al ser un traxe burgués, el traxe d'aldeana recibe siempre la influencia de la moda de París, que na segunda metá del XIX gusta de tonos sobrios como'l marrón, el gris, el granate, l'azul escuru o'l violeta. El coloráu, tinte caru de mano, acaba popularizándose tanto que na Inglaterra victoriana táchase de vulgar y nun casa colos gustos de la moda del momentu.

3- El negru, que Santoveña afirma que ye de reciente incorporación, enxamás sedría usáu antiguamente por ser el color del llutu, y por ello impropiu d'un día festivu.

Nel cartel de propaganda de dulce "La cooperativa española", de 1900, vese una ilustración d'una aldeana y un porruanu. Ella lleva un traxe marrón combináu con coloráu. Ignoro cuándo surde'l vezu de llevar mandil, xustiyu, pañuelu y banda nun mesmu color.

Na semeya que pongo darréu vense traxes actuales en colores acertaos.

Aparte de los traxes de tela a cuadros, que yá comentemos anteriormente, vemos na semeya de más abaxo una tela de florines pa la saya distinta a la de la chaquetiya, adornada por llorcies y cintes de terciopelu.
La moza lleva un dengue de seda o pañete con adornos picaos de terciopelu en ringo-rango nel escote y una chaquetiya colgada del brazu izquierdu adornada na solapa col mesmu motivu y con tira ancha de terciopelu a la cintura. Lleva un mandil claru con motivos vistosos que contrasta col restu'l traxe, que se ve más escuru. Como calzáu, zapatos a la moda.
El traxe cuento que ye d'ente les décades de 1870 y 1880 y nun se -y aprecia nengún tipu de pasamanería nin agremanes. El peináu tamién ye característicu d'esa dómina.

La pasamanería

2010-07-24T11:25:00.005+02:00

La moda del polisón supón un cambiu importante na silueta femenina del últimu cuartu del sieglu XIX; les sayes qu'antes yeren desaxeradamente abultaes, gracies a les crinolines o a les munches inagües y refaxos que se poníen debaxo, gusten agora de llevase estilizaes, independientemente de que lleven o non polisón y cola. Tamién apaez ciertu gustu por adornar los vistíos con draperíes, cintes y puntilles, en contraposición al sobriu estilu de mediaos de sieglu.
Esta moda algama tamién a los traxes d'aldeana llanisca, llenando los dengues y mandiles de cintes de pasamanería y agremán. Los bordaos de coral negru, especialmente na saya y la chaquetiya, son muncho más recientes.

La moza de la semeya va peinada al estilu de los años 80 - 90 y trai un pañuelu atáu "a la llanisca". Lleva una chambra con puños de volante y un xustiyu de tela de tapicería o adamascao. El dengue y el mandil, en terciopelu negro, van orniaos por una pasamanería d'entellazos en color claru y remataos con "madroños", igual que la chaquetiya. Curiosamente ésta ta fecha en terciopelu negro y nun ye del mesmu material nin color que la saya, que ye de pañu claro (beige, mariellu...) y va adornada con tres cintes anches de terciopelu negro. Seguramente vaiga calzada de zapatu negru y como complementu trai un collar de cuentes de tres vueltes y unos pendientes de llárimes que posiblemente seyan de coral colloráu.

Traxes de tela a cuadros

2010-05-20T09:53:00.009+02:00

"El traje de las mujeres artesanas, y de las medianamente acomodadas, lo mismo que el de las labradoras hasta el primer tercio del presente siglo (XIX), consistía en camisa y enagua de cáñamo o lino, justillo de tela pintada, refajo de bayeta, basquiña (saya) y jubón de sayal, sayalín o estameña, dengue de bayeta más fina llamada miliquín y pañuelo de hilo o algodón para la cabeza atado al moño, calzas o medias de lino o lana, corizas o zapato escotado y un mandil de lienzo o percal pintado. La basquiña nunca bajaba más de 15 o 20 centímetros hasta la planta del pie. Todo el género de lana o cáñamo y lino que constituía estas prendas era cosechado en el país.

Aquel traje peculiar del país, que en todo el mundo era conocido como llanisco-asturiano, sólo se gasta hoy por algunas jóvenes como disfraz en romerías y fiestas populares, pero compuesto de costosas telas y ricos adornos, que cuadran mal con su primitiva sencillez y las naturales gracias de la mujer".

Manuel García Mijares, Apuntes histórico-Genealógicos y Biográficos de Llanes y sus hombres, 1893.

Nesti textu de finales del sieglu XIX yá se fai una clara distinción ente los traxes que llevaben les muyeres pertenecientes a clases populares (llabradores, artesanes) - del que yá falaré con más calma otru día- y los traxes d'aldeana, de los que l'autor diz que son disfraces qu'imiten a los anteriores.

Pa Miyares los primeros yá tan desaniciaos nesa dómina (1893). Anguaño tendríemos que falar d'unos traxes de transición ente la indumentaria tradicional de principios del XIX y la que resulta de la "democratización" de la moda burguesa a lo cabero'l sieglu.

Nestes semeyes d'a lo último la centuria vemos traxes d'aldeana fechos en tela a cuadros seguramente d'algodón. Esti material, motor del desendolque industrial no tocante a la industria textil, pasó de ser un xéneru exóticu na Europa del XVIII que solo los más pudientes podíen permitise, a espardese'l so usu, gracies a la mecanización de la producción, ente toles clases sociales nes décades finales del sieglu siguiente. Esti espardimientu trexo como novedá la popularización de teles estampaes, a cuadros, con florines o de llunares.

Pa Miyares, estes innovaciones nun faen sinon convertir el traxe d'aldeana en disfraz, al ser éstes teles costoses que según él cuadran mal con su primitiva sencillez.

Gracies a Von Aisaider pola semeya d'esta neña

El mesmu traxe

2010-03-24T16:29:00.003+01:00

Delles veces los traxes yá fuere pol eleváu preciu o pol pocu usu que se -yos llegaba a dar emprestábense y heredábense. Por eso topamos el mesmu modelo en varies semeyes.
Tampoco nun se pue descartar que'l propietariu fuere'l propiu fotógrafu, de mou que cualquier moza pudiere retratase vistida d'aldeana.

Pa una descripción detallada del traxe ver lo espublizao el 4 de mayu de 2.009, onde comento otra semeya del mesmu.

El miriñaque (II)

2010-02-25T11:33:00.014+01:00

Falando de moda burguesa, a partir de la década de 1830, les sayes van ganando ca vez más amplitú; p'acampanales a lo primero poníen enagua sobro enagua, y tamién crinolines, enagues de llino endurecío con tires de crin de burru cosíes pa faceles más ríxides.

A mediaos de la década de 1850 la emperatriz de Francia Eugenia de Montijo punxo de moda'l miriñaque, un aparatu novedosu y estravagante, consistente nunos aros d'acero flexible pero indeformable xuníos per unes tires de tela, que permitíen acampanar les sayes hasta lo inimaxinable y allixerar el pesu de tanta enagua, que dexa de ser necesaria.

Pa la segunda metá de los años 60 del XIX el miriñaque va evolucionando y dexa de ser circular p'adoptar una forma elíptica, dexando les sayes baxar casi en recto per delantre y faciendo una gran cola per detrás, que va ser l'antecesora de los polisones de los 70.

Volviendo a la semeya del principiu vemos cómo la moza lleva un traxe d'aldeana con miriñaque. Sobra volver a dicir qu'estos traxes "d'aldeana" nun son precisamente les aldeanes les que los visten, y polo tanto adáptense a la moda del momentu.

Ye difícil saber si tamos énte un miriñaque redondu o elípticu; lo más probable ye que seya redondu porque a les dames que lleven miriñaques elípticos suel gusta-yos restratase de perfil pa llucir la cola. Otra manera, el pelo tapando les oreyes tamién suel ser característico de los peinaos anteriores a 1865.

El traxe ye cenciellu, la saya lleva como adornu tres grupos de tres cintes de terciopelu caún, la chaquetiya y el dengue adornos picaos en ringo-rango y tres cintes nos puños. El mandil, mui estrenchu a la cintura, lleva un motivu mui simple bordau alredor y una especie de blonda rematándolu. Unes cadenes, un broche y unos pendientes completen los adornos.

Nesta semeya, la emperatriz Carlota de México amosando l'ampulosidá que llegaron a algamar los vistíos con miriñaque (1864).

Otru exemplu de traxe simple

2010-01-29T14:23:00.005+01:00

Peinaos como esti, de moñu altu, ensin flecos nin tupés, enmarcaos por grandes rodetes postizos punxéronse de moda na década de 1870.
El traxe que lleva la moza ye de pañu. La saya tien munchísimu vuelu, y seguramente lleva debaxo un refaxu o más pa da-y más volume. Pa engalanala punxéron-y seis cintes de terciopelu en color claru o seda, enmarcaes en dos llorcies, una perriba y otra per baxo.

La mesma cinta usóse pa orniar los puños, cuellu, solapes y cintura de la chaquetiya, que llama l'atención pola amplitú de les mangues.

Lleva un dengue negru rematáu con cinta de pasamanería y mandil cuadráu, posiblemente de terciopelu escuru, adornáu con tres cintes de pasamanería o llabraes. Tres de la cinta más interior, na esquina inferior izquierda (y probablemente na drecha tamién, anque nun se vea) lleva un motivu floral/vexetal bordáu. Lleva dalgún tipu de fleque na parte baxo pa rematalu.

Detrás del rodete postizu lleva el pañuelu que casi nin s'atalanta. Como xoyes lleva pendientes, gargantiella de cinta con bixu y broche nel dengue.

Les primeres semeyes

2009-12-15T14:13:00.004+01:00

Normalmente soi roceanu a dar feches demasiao antigües a la hora datar una fotografía, pero esta tien ellementos que me faen pensar que pue ser de la década de 1850, como pue ser el corte pelo y la forma de peinase del home.
Elli lleva un traxe que podemos llamar "de transición" con camisa, xilecu con solapes, chamarra negra rematada con vies de color más claru, faxa y pantalón llargu en cuenta calzón curtiu.
La muyer trai un traxe d'aldeana mui cenciellu, con chaquetiya adornada con picaos en ringo-rango na solapa, saya con un par de llorcies finines (nun se ve si lleva más adornos), dengue ensin pedrería denguna, mandil cuadráu curtiu de tela que fai cuadros na trama con dos cintes fines de terciopelu. Llama l'atención que'l pañuelu llega hasta la empezadura del pelo, tapando parte de les oreyes y non más atrás como se ve nos años sucesivos.
La neña y el bebé lleven camisa, saya y mandil.

Una familia de mediaos del XIX

2009-11-01T14:59:00.007+01:00

Esta semeya tien gran importancia por tres razones: lo antiguo, la bona calidá d'imaxe y que nella puen vese dos traxes completos d'home y muyer.

La datación nun ye cenciella y siempre ta abierta a alegaciones. Baséme principalmente na forma peinase y llevar la barba del paisanu, característica de finales de los años 1850 - principios de los 1860; ella lleva'l pañuelu bordeando la cara. Les muyeres d'aquella peinábense con raya al mediu, tapando col pelo les oreyes, y facíen un moñu baxu na parte atrás de la cabeza. A partir de 1865 esta tendencia cambia, les oreyes empiecen a vese y pasín ente pasu el pelo dirá prendiéndose ca vez más p'arriba, situándose los moños na parte alta de la cabeza pal restu'l sieglu. El pañuelu, dirá evolucionando tamién na forma de ponelu, separándose de la empezadura del pelo hacia arriba a medida que los moños se van faciendo más altos.

Falando del traxe d'ella hai que destacar lo austeru que ye, tamos avezaos a ver traxes recargaos d'adornos en pasamanería y pedrería cuando esti tien únicamente un reborde finísimu en terciopelu y una discretísima cinta bordada pa rematar la pechera y los puños de la chaquetiya; el dengue lleva unes cintes tresversales tipu "tripa de pollo" como únicu ornatu. La saya, de munchu vuelu, y el mandil, cuadráu y mui fruncíu nun lleven terciopelu siquiera, simplemente unes llorcies na propia tela -yos sirven d'aderezu. Les xoyes, poques y discretes.

L'home lleva una camisa de cuellos almidonaos y bien alzaos como yera moda a mediaos del XIX, xilecu de pañu con solapes y chamarra. El calzón va abotonáu nos llaterales y remata con una guyeta, nun dexando ver los canzonciellos. Trai medies de llana y va calzáu de zapatos, igual que la muyer; nun lleva montera. Na mano, un paragües.

La fía, vistida a la moda burguesa, ye'l puntu central del retratu y danos información de la clase social a la que peretenecen los pas, que van ataviaos "d'asturianos" pa la ocasión. La globalización nel vistir burgués de la época contrasta col sentir románticu de pertenencia a un llugar y lleva a veces a la xente de clases acomodaes a retratase cola indumentaria'l país.

El matrimoniu que nun yera de 1908

2009-09-24T14:00:00.003+02:00

Matrimonio de 1908. Eso ye lo que ponía al pie d'esta semeya el llibru La foto y su historia, espublizáu col diariu llaniscu El Oriente de Asturias. Tovía nun analicemos los traxes d'aldeana de principios del sieglu pasáu pero al repasar les tipoloxíes de la segunda metada del XIX decatámonos de que correspuende más bien a la década de 1880 aproximadamente.

L'home va vistíu a la moda burguesa, con pantalón llargu, chaqueta, xilecu (con solapes), camisa con tarabica, cadena y reló.

La muyer lleva un traxe d'aldeana preciosu. Lo primero que me llamó l'atención fue que nun coincidía nin el collor nin el xéneru de la saya y la chaquetiya, como suel ser vezu. La saya, de gran vuelu y adornada con cintes de pasamanería ye parda o de color, mientres que la chaquetiya ye de terciopelu negro, igual qu'el dengue. Dambos lleven cintes de pasamanería rematando los bordes.
El mandil ye dignu de mención, lleva bordaes fueyes de racimal con apliques de pedrería a mou d'uves y fleco nel borde.
Acolúmbrase bien el pañuelu y lleva banda, que como yá dixi, nun yera omnipresente daquella; zapatu negru y media blanca asomen perbaxo la saya.
Como xoyes lleva unos perendengues que recuerden a les arrecaes portugueses, una cinta con medalla como gargantilla y un broche nel pechu. Como elementu de prestixu, un abanicu na mano.

antaño versus anguaño

2009-08-13T12:47:00.007+02:00

A veces na rede tópense semeyes como esta, mui ilustrativa pa comentar la evolución del traxe d'aldeana, l'antes y l'agora, l'antaño y l'anguaño. Trátase d'una esposición d'indumentaria tradicional asturiana de la qu'ignoro autor, fecha y llugar en que se fexo, anque camiento que puea ser del colectivu Vezos Astures na feria de L'Ascensión d'Uviéu.

Estremaes por un ramu, vemos dos pareyes con traxes del Oriente, a la manzorga el que se llevare a mediaos del s. XIX y a la mandrecha el que se lleva agora de manera ritual.

El traxe del home antiguamente nun se diferenciaba del que se llevaba nel restu d'Asturies; ye a principios del sieglu XX cuando apaecen les diferencies que "caractericen" al traxe de porruanu, como son los remontes faciendo formes vexetales nos calzones y la chaqueta o'l vezu de nun vistir les mangues d'esta, aparte de la tipificación del usu de medies azules y coricies.

Nel traxe d'aldeana la tresformación ye muncho mayor. El dengue, el mandil y la saya arretáquense de bordaos en pedrería (acebache, cristal), costume qu'entama a finales del XIX y va xorreciendo a lo llargo del XX; la chaquetiya dende la década de 1.880 va prendida siempre al hombru izquierdu y dexa de vistise, llegando incluso a cosese al dengue. La banda antiguamente nun yera omnipresente como agora, anque hai testimonios de que se llevaba yá na década de 1860. El pañuelu solía atase atrás pa los díes de fiesta y enriba la frente (como nel restu d'Asturies) pal diario. El llargu de la saya va variando según la moda durante'l pasáu sieglu, pasando de llegar a los todíos nes primeres décades a ser minifalderu nos 60, anque polo xeneral, dende los años 20 llévase a media pierna. Últimamente ta poniéndose "de moda" volver a formes d'entamos del sieglu XX: sayes llargues hasta'l todíu, menor cantidá de pedrería, bordaos más cenciellos imitando a los antiguos...

La semeya de boda

2009-06-23T13:23:00.011+02:00

Pa Gausón Fernande tamos énte una semeya de boda de 1890. La pareya nun parez pertenecer a una clase social mui pudiente:

L'home va vistíu a la moda, con un traxe clásicu de pantalón llargu, xilecu ensin solapes y americana; camisa de cuellu de tira con corbata clara y zapatu. Nun lleva sombreru, a lo meyor por tar nun sitiu zarráu o por miéu a que -y tapare la cara. Yá abandonare'l vistir tradicional.

La muyer, por contra, trai un traxe d'aldeana llanisca que incorpora elementos antiguos y modernos (refiérome a la década de 1890), que basándonos nel analís d'otres semeyes antigües intentaremos datar darréu:

- La chaquetiya coincide coles que se llevaben nos 1870's y primero, col clásicu adornu en ringo-rango de la pechera. Pa la dómina que tamos tratando les chaquetiyes yá tienen adornos en pasamanería y posiblemente en pedrería, y empiecen a vese prendíes sobro l'hombru izquierdu.
Posiblemente se trate d'una pieza antigua reutilizada.

- La saya, d'ampliu vuelu, va adornada con cinco cintes de terciopelu bastante xuntes. Hasta entós l'adornu nun solía pasar de tres, intercalaes con llorcies. A partir de los 90 dexen d'usase llorcies y aumenta'l númberu de cintes de terciopelu, combinándose a veces con otres de pasamanería negro.

- El dengue, con base en terciopelu negru va rematáu por una especie de cinta de cuatro filigranes, que nun descarto que lleve pedrería fina aplicada, anque inclínome más a pensar que se trata d'una cinta llabrada llamativa. Esta cinta tamién dibuxa el característu adornu tresversal del que falemos n'entraes anteriores. Como remate al esterior y, magar que nun se percibe mui bien, lleva un flecu de filos.

- El mandil, curtiu y de forma rectangular, colos bordes redondiaos, ye de les pieces más guapes d'esti traxe. Ta fechu en terciopelu de color y lleva flores bordaes o aplicaes, enmarcaes nuna cenefa de dos cintes de pasamanería. Como remate, un flecu compuestu d'enrexáu y pingos de pedrería d'acebache.

- Como xoyes lleva una medalla al pescuezu nuna cinta, unos perendengues y un reló colgáu d'una cadena o cordón y prendíu a la cintura sobro'l mandil, amás d'un broche en pechu.

El miriñaque

2009-05-13T13:08:00.012+02:00

Esta semeya plantégame dellos problemes de datación al ser una mestura d'estilos y modes.
Lo primero que llama l'atención ye la forma de la saya, qu'acampana como si llevare un miriñaque perbaxo. Esti preséu, formáu por varios aros d'acero dexó d'usase a finales de la década de 1860. Los volantes que lleva d'adornu la saya son más característicos de los años 70 del XIX, anque daquella les sayes yá nun yeren de corte acampanáu, sinon de polisón.
Hai que decatase entós del peináu. Antes de finales de la década de los 80 les muyeres siempre se peinaben de raya al mediu, solo nesi momentu empiecen a aportar los flecos, tupés y rizos sobro la frente. Tariémos entós alrodiu 1890.
La modelo pudo aprovechar ropa vieyo, prendes que quedaren démodés, adaptándoles al gustu d'ella pa facer el so traxe d'aldeana.

El mandil tien forma rectangular anque ta redondiáu nos picos inferiores. Va adornáu con cinco cintes de terciopelu tou alredor y otres más fines de pasamanería al interior.
Como banda lleva unos cabos colgando a la derecha del mandil que rematen nuna especie de borla o ferrete.
Trai xustiyu y dengue, posiblemente de seda y terciopelu, al mio gustu bastante raquíticu; camisa de mangues de vuelu y quiciaves pañuelu puestu a la llanisca. Curiosamente nun lleva chaquetiya.
D'aderezu unos perendengues y unes cadenes o gordones al cuellu.

La muyer de la sombriya

2009-05-04T19:38:00.008+02:00

Vemos equí una muyer posando elegantemente pa un retratu vistida d'aldeana y acompañada de dos elementos burgueses como son la silla tapizada y la sombriya, símbolos de prestixu y recuerdu a la clase social a la que pertenez.

-Nun se distingue bien si lleva pañuelu o non, anque ye mui probable.

-Lleva un dengue seguramente de terciopelu negru orniáu con pasamanería nos bordes y tamién con tires tresversales na solapa que monta sobre la otra. La chaquetiya que lleva encima tien les solapes adornaes con apliques de la mesma tela de la prenda y botones sobre ellos, nos puños doble cinta fina de terciopelu negro.

-La saya tien como adornu dos estayines de terciopelu negro, una formada por tres cintes y otra por cuatro, cola peculiaridá de que baxen en picu na parte d'alantre, xusto debaxo'l mandil.

-El mandil, en terciopelu negro, lleva bordaes cuatro filigranes n'acebache de bon calibre y va rematáu con blonda d'encaxe prieto.

-De xoyerío lleva la imprescindible gargantiya de cinta terciopelu cola medalla o camaféu, unos perendengues y una cadena que, xuntando los dos cabos sobre'l pechu, va prendese sobre la cadera izquierda, a lo meyor con un reló.

La semeya pue datase nos años 80 del sieglu XIX. En comparación cola década anterior, los traxes ca vez son menos austeros, les pasamaneríes y los bordaos de pedrería van invadiendo dengues, mandiles y chaquetiyes, magar que nunca lleguen a recargase tanto como agora.

Grupu familiar

2009-03-27T11:50:00.006+01:00

Nesti retratu de familia volvemos a ver cómo'l traxe d'aldeana nun ye una prenda cotidiana, anque sí de prestixu, yá que éstes, como otres tantes moces de posibles, escuéyenlu pa salir nuna de les poques semeyes que se facíen d'aquella. Ye significativo ver cómo tanto la señora mayor como los homes van vistíos a la moda y nun conserven elementos del paxellu tradicional. La fotografía pue datase ente finales de la década de 1860 y principios de la de 1870.

Los traxes de les moces son casi hermanos, fechos principalmente en pañu de llana y adornaos con terciopelu. La moza de la mandrecha lleva doble filigrana de pedrería de gran calibre na pechera y cuellu de la chaquetiya (nun s'aprecia si na cintura tamién) y probablemente nos puños.

Quiero facer una mención especial a los adornos del dengue. Ésti ta fechu en pañu finu o quiciaves en dalguna seda, y ribetiáu con tires llises o faciendo ringo-rangos de terciopelu negru.
La peculiaridá ta en que tamién lleva eses tires cosíes tresversalmente nuna de les solapes (la que monta p'enriba la otra) faciendo un efectu ópticu curiosu, creando una aparente confusión na configuración de la prenda. Talmente paez como si nun se distinguiera qué solapa ye la que monta y cuála la que va per baxo. Esto apréciase mui bien nel dengue de la moza de la mandrecha.

Más p'alantre veremos al traviés de les semeyes qu'esti tipu d'adornos son mui frecuentes nos traxes antiguos, y por desgracia, anguaño a los indumentaristes nun-yos da por recrealos.

Tipoloxíes heterodoxes

2009-02-17T19:16:00.005+01:00

Anque de mano nun lo pareza esta moza tamién va vistida d'aldeana llanisca. Al principiu pensé que podía ser un error, al ver un traxe con mantu d'hombros y xugón envede chaquetiya y dengue, y incluso alcordéme de los traxes que llamen d'ayerana; pero tien detalles que lu faen casi ensin duldes xenuinamente llaniscu:

El pañuelu va atáu sobro la ñuca, nesta dómina tovía nun s'estilaba lo de facé-y les llorcies y yera más llargu d'atrás. Esta manera de ponelu ye mui asemeyada a l'ayerana.
Los mantos d'hombros usáronse en toda Asturies a finales del s. XIX y principios del XX, y l'Oriente nun fue una esceición, magar que ye verdá que pa vistise "d'aldeana" d'aquella lo más común yera facelo con dengue y chaquetiya.
Lleva un mandil que paez de raso o dalguna seda ribetiáu con tires d'agremán (pasamanería con pieces d'acebache engarzaes), igual que los puños del xugón. Estes guarniciones tan riques nun lleguen a vese más que pal Oriente per estes feches.
La saya lleva dos cintes de terciopelu y ente elles paez que s'aldovina un adornu que pue ser bordáu o aplicáu.
Na mano lleva un abanicu, elementu de distinción y elegancia, complementu davezu de los traxes d'aldeana.

Podemos datala aproximadamente na década de 1890 (usu d'agremán, mantu d'hombros, nengún peináu carauterísticu d'otra dómina...)

El dilema de la chaquetiya (II) (continuación)

2009-02-10T00:24:00.005+01:00

Equí podemos ver otru exemplu de spencer con vistíu de camisa. La chaqueta tien adornos en ringo-rango na pechera como los de los traxes d'aldeana más cenciellos y/o los populares que los imitaben. Ver la foto del mio primer post.

La perconocida maja vestida de Goya lleva tamién un tipu de spencer con adornos goyescos (rede prieta con madroños).

El dilema de la chaquetiya (II)

2009-02-09T19:07:00.007+01:00

Andando pela rede topéme con esta semeya del muséu del traxe de Madrí(http://www.museodeltraje.mcu.es/) y fíxome cavilar. Falé n'otru post de la resistencia a la moda francesa n'España pero nun menté a los burgueses (clase social que taba garrando puxu nesta dómina) y a los denostaos afrancesaos que creyíen nos ideales de la Revolución. Esta xente siguía la moda de París y marcaba estilu, llegando a influyir nos traxes de maja, ¿o fue al revés?

Falé tamién de les chaquetiyes de la indumentaria goyesca (o de maja), qu'en realidá nómense xugones (jubones), y de les spencer d'estilu Imperio que casualmente n'España tamién se llamen xugones y non siempre son zarraes d'alantre como vemos na semeya. Esto yá se va apaiciendo más a una chaquetiya llanisca.

La spencer o jubón llevábase sobre'l vistíu camisa, caracterizáu pol talle altu y llamáu asina n'España por ser anterizu como la camisa interior.

Gausón Fernande tenía razón, la chaquetiya ye un xugón, pero sólo de nome; la manera de vistila tien que ser sobro'l dengue (como la spencer) y non debaxo (como los xugones tradicionales).

El dilema de la chaquetiya

2009-02-03T11:15:00.013+01:00

Pa Gausón Fernande, nel so llibru "El paxellu asturianu o traxe'l país", la característica chaquetiya del traxe d'aldeana ye una forma de xugón, prienda non mui conocida de la indumentaria tradicional asturiana que consistía nuna especie de xustiyu pero con mangues y fechu en tela más fuerte, pol xeneral igual a la saya (estameña, sayalín, pañu...). Diba mui entalláu y poníase debaxo'l dengue, anque pa Cangas y otros llugares del Occidente llevóse ensin él y con solapes, a mou de chaqueta. Según l'autor, "En Llanes, Onís y Cabrales [el xugón] ye una chaquetina curtia que se llevaba puesta per fuera, encima del dengue".

Tengo que dicir que nun toi del too d'alcuerdu con esto, nun veo una evolución natural tan nidia del xugón a la chaquetiya. Ye verdá que Gausón aporta una semeya d'un matrimoniu de Porrúa de 1871 na que la muyer lleva un xugón (o chaquetiya) puestu de manera peculiar, per debaxo'l dengue a la altura los hombros y penriba d'él a l'altura la cintura. Creo que "El traje de las mujeres artesanas y de las medianamente acomodadas, lo mismo que el de las labradoras hasta el primer tercio del presente siglo (XIX)" por usar les pallabres de García Mijares, llevaba un xugón igual que'l del Centru'l país. Cuando surde'l traxe d'aldeana, incorpora la chaquetiya como elementu novedosu. Como yá tengo dicho, esti fatu creó moda; les muyeres que llevaben davezu xugón adautáronlu ensin munchos problemes a una chaquetiya abierta, simplemente quitando-y les guyetes si les tenía, recortándo-y les faldetes nel mesmu casu pa da-y forma recta per baxo y vistiéndolu enriba'l dengue en cuenta dir so ésti.

¿Por qué lleva chaquetiya el traxe d'aldeana?

Esta ye la entruga'l millón. De mano pensé na influencia de la moda burguesa o de París, pero nun llegué a nenguna conclusión; chaquetes, chaquetiyes, chaquetones usáronse nel sieglu XVIII y primero, pero nun yera atuendu imprescindible, aparte de que nun topé nenguna que me recordara nin de llueñe a la tipoloxía qu'usaben les llanisques. A principios del XIX, cuando la moda Imperio, llevóse una especie de chaquetiya mui curtia (hasta debaxo'l pechu) y zarrada que se nomaba Spencer. El problema ye que la moda Imperio nun caló muncho n'España pol tema de la invasión napoleónica; había cierta resistencia a la moda francesa por parte de les clases pudientes (que yeren les que podíen permitise dir a la moda) y entamaron a apaicer yá dende'l s. XVIII modelos qu'imitaben a los traxes populares castizos, conocíos como de maja.
Esti tipu de traxes llevaben davezu una chaquetiya curtia y abierta que nun abrochaba, talmente como la que lleva la moza de la semeya de más arriba. Nun hai qu'escaecer que munches de les moces de posibles qu'empezaron a llevar los traxes d'aldeana veraneaben en Llanes pero vivíen en Madrid.
Nun dexa de ser una teoría.

La semeya qu'aparez sobre estes llinies probablemente seya de la década de 1880. La moza lleva un mandil de tela adamascao, el dengue guarníu con pasamanería y cintes de terciopelu na chaquetiya y la saya como únicu adornu. Los bordaos d'acebache tovía nun se llevaben.

2009-01-27T17:47:00.007+01:00

Esta semeya de 1870 apaez espublizada nel llibru de Fe Santoveña "La indumentaria popular en el concejo de Llanes" y paezme una bona forma d'empezar esti blog dedicáu al traxe d'aldeana y en xeneral a la indumentaria tradicional y popular del Oriente d'Asturies.

Anguaño tol mundu que tenga un conocimientu mínimu sobre indumentaria asturiana sabe, o tien una imaxe mental de cómo ye un traxe d'aldeana. Existen, amás, indumentaristes, xente que se dedica a facelos pa vendelos o alquilalos -opción ésta que según tengo entendío ta mui espardida pel Oriente- y son los/les que marquen la pauta de lo que ta "de moda" y lo que non (los dibuxos nos bordaos de coral, los colores,etc.).

Sicasí, esti tipu de traxes nun fueron siempre igual qu'agora, tienen un orixe y una evolución.

L'orixe podemos velu nel Romanticismu, dómina na que "lo popular" ta de moda ente les clases acomodaes. Y ehí ta la primera verdá del indumentu en cuestión, que nun yera una forma de vistir del pueblu llanu sinon una especie de traxe ritual -nun quiero dicir disfraz porque nun creo que fuere la intención de les que lu llevaben- de les señorites de sociedá cuando se revistíen d'aldeana. D'ehí'l nome.
Nun hai qu'escaecer que nesi tiempu tamién surden los bandos en Llanes, qu'amás de tener tintes políticos organizaben les fiestes, ocasión perfecta pa que les fíes del marqués que veraneaben na villa vistieren los sos flamantes traxes d'aldeana y participaren nos distintos rituales qu'hubiere (procesiones, ramos, dances...).

La ropa que vistíén les muyeres más humildes daquella nun se diferenciaba gran cosa de lo que llevaben nel restu d'Asturies, si acasu los dengues, que cruzaben na espalda ensin llegar a atase y yeren dalgo más estrenchos d'arriba, los mandiles de fiesta, que tendíen a ser curtios y non mui anchos, y cierta costume (pa díes festivos tamién) d'atar el pañuelu atrás, sobre'l moñu envede sobre la frente. El género yera mui basto (llinu pa la ropa blanco, sayalín, estameña y bayeta pal restu), y les señorites, a la hora de facer los sos traxes d'aldeana, fue lo primero que camudaron, enriqueciéndolos al introducir fines teles d'algodón pa la ropa blanco, vaporoses enagües en cuenta los refaxos de bayeta, seda pa los mandiles y los pañuelos, etc.

Curiosamente, la influencia d'estos vistíos finos revierte na indumentaria tradicional, qu'imitará durante unos años na medida lo posible les nueves formes y prendes, hasta qu'a finales del XIX la moda burguesa se popularice y acabe colos vezos autóctonos nel vistir, quedando el traxe d'aldeana como únicu esponente del vistir llaniscu propiamente dichu y por estensión del Oriente d'Asturies.

La evolución del traxe d'aldeana pasa por dir siempre a la moda. Esto como meyor se ve ye al traviés de les semeyes antigües. Les más vieyes puen datase alrodiu 1850-1860, onde vemos sayes con munchísimu vuelu munches veces con miriñaque; nos años 70 reduzse el vuelu, y nos 80 los peinaos pasen de ser de raya al mediu a tener flecos con rizos qu'aprucen perbaxu'l pañuelu; nos 90 empiecen a apaecer los adornos de coral, con tires d'agremán especialmente nos mandiles. Entrando nel sieglu XX pónense de moda los peinaos tipo Gibson Pompadour (llamaos moños de corona por Luís Argüelles), aumenta la pedrería, les sayes faense más entubaes y la chaquetiya instálase definitivamente como un adornu dobláu sobre l'hombru izquierdu; nos años 20 y 30 nótense los cortes de pelo a la moda y les ondes, nos 40 la saya acórtase per debaxo la rodía y nos 50 llévase acampanada, p'acabar convirtiéndose en minifalda nos 60. A partir de los 80 vese ciertu interés por volver a formes antigües o más elegantes, vuelven a allargase les sayes y úsense meyores materiales, anque la cantidá de pedrería que lleva bordao sigue siendo, polo xeneral, escesiva. Cuestión de gustos y modes.